راولپنڈی (نمائندہ خصوصی)پاکستان اور آسٹریلیا کے درمیان ون ڈے کرکٹ سیریز 2026 کی تیاریوں کے سلسلے میں قومی ٹیم نے پنڈی سٹیڈیم میں پریکٹس کی، اس موقع پر راولپنڈی پولیس نے سکیورٹی اور ٹریفک کے جامع انتظامات کو یقینی بنایا تاکہ کھلاڑیوں کو محفوظ اور پرامن ماحول فراہم کیا جا سکے۔ سی پی او سید خالد محمود ہمدانی نے کہا ہے کہ بین الاقوامی کرکٹ سرگرمیوں کے کامیاب انعقاد کے لیے راولپنڈی پولیس مکمل طور پر متحرک ہے اور سکیورٹی کے فول پروف انتظامات کیے گئے ہیں۔ انہوں نے بتایا کہ پریکٹس سیشن کے دوران 3500 سے زائد پولیس افسران و اہلکار سکیورٹی ڈیوٹی انجام دے رہے ہیں جبکہ ٹریفک کی روانی برقرار رکھنے اور شہریوں کی سہولت کے لیے 300 سے زائد
ٹریفک پولیس افسران تعینات کیے گئے ہیں۔ انہوں نے کہا کہ سینئر پولیس افسران خود فیلڈ میں موجود رہ کر سکیورٹی ڈیوٹی پر مامور اہلکاروں کو چیک اور بریف کر رہے ہیں تاکہ تمام انتظامات کو مؤثر انداز میں یقینی بنایا جا سکے۔ سٹیڈیم اور اطراف کی اہم عمارتوں کی چھتوں پر سنائپرز بھی تعینات کیے گئے ہیں جبکہ سیف سٹی اور دیگر سی سی ٹی وی کیمروں کے ذریعے مسلسل مانیٹرنگ جاری ہے، اس مقصد کے لیے خصوصی کنٹرول روم بھی قائم کیا گیا ہے۔ سی پی او نے بتایا کہ اہم تنصیبات اور عوامی مقامات پر اضافی نفری تعینات کی گئی ہے جبکہ بس اڈوں، ہوٹلوں اور دیگر حساس مقامات کی خصوصی نگرانی کی جا رہی ہے۔ تھانوں کی موبائلز، ایلیٹ فورس اور ڈولفن اسکواڈ سٹیڈیم کے اطراف مسلسل گشت کر رہے ہیں تاکہ کسی بھی ناخوشگوار واقعے سے بروقت نمٹا جا سکے۔ انہوں نے کہا کہ شہریوں اور کرکٹ شائقین کی سہولت کے لیے مؤثر ٹریفک پلان ترتیب دیا گیا ہے اور ٹریفک کی روانی برقرار رکھنے کے لیے تمام دستیاب وسائل بروئے کار لائے جا رہے ہیں۔ سید خالد محمود ہمدانی نے اس عزم کا اعادہ کیا کہ پاکستان اور آسٹریلیا کرکٹ سیریز کے دوران فول پروف سکیورٹی انتظامات کو ہر صورت یقینی بنایا جائے گا تاکہ بین الاقوامی سطح پر پاکستان کا مثبت تشخص مزید اجاگر ہو اور کھیلوں کی سرگرمیاں خوش اسلوبی سے جاری رہ سکیں۔
پاکستان اور آسٹریلیا کے درمیان ون ڈے کرکٹ سیریز 2026 کی تیاریوں کے سلسلے میں قومی ٹیم نے پنڈی سٹیڈیم میں پریکٹس کی
