چیئرمین سینیٹ یوسف گیلانی کا پاکستان اور آسٹریلیا کے درمیان پارلیمانی و دوطرفہ تعلقات مزید مضبوط بنانے پر زور

اسلام آباد(نمائندہ خصوصی):چیئرمین سینیٹ سید یوسف رضا گیلانی نے پاکستان اور آسٹریلیا کے درمیان تعلقات کو مزید مستحکم بنانے کے لیے پارلیمانی روابط، تجارت و سرمایہ کاری، تعلیم، دفاعی تعاون اور عوامی سطح پر روابط کو فروغ دینے کی ضرورت پر زور دیا ہے۔ انہوں نے ان خیالات کا اظہار پارلیمنٹ ہاؤس اسلام آباد میں پاکستان میں آسٹریلیا کے ہائی کمشنر ٹموتھی کین سے ملاقات کے دوران کیا۔ چیئرمین سینیٹ نے کہا کہ پاکستان آسٹریلیا کے ساتھ دیرینہ اور دوستانہ تعلقات کو قدر کی نگاہ سے دیکھتا ہے۔ انہوں نے دونوں ممالک کے درمیان مشترکہ جمہوری اقدار، دولتِ مشترکہ کی روایات، دو ایوانی پارلیمانی نظام اور عوامی روابط کو باہمی تعلقات کی مضبوط بنیاد قرار دیا۔ چیئرمین سینیٹ نے پاکستان کی ترقی، بالخصوص تعلیم اور انسانی وسائل کی ترقی میں آسٹریلیا کے کردار کو سراہتے ہوئے آسٹریلیا میں مقیم پاکستانی کمیونٹی کی سماجی و معاشی ترقی میں قابلِ قدر خدمات کو بھی خراجِ تحسین پیش کیا۔چیئرمین سینیٹ نے آسٹریلوی ہائی کمشنر کو انٹر پارلیمانی اسپیکرز کانفرنس کے بارے میں آگاہ کیا، جس کے وہ بانی چیئرمین ہیں۔ انہوں نے بتایا کہ پہلی انٹر پارلیمانی اسپیکرز کانفرنس پاکستان میں، دوسری کمبوڈیا میں منعقد ہوئی جبکہ تیسری کانفرنس فروری 2027ء میں انڈونیشیا میں منعقد ہوگی۔ ملاقات میں انٹر پارلیمانی یونین کی آئندہ صدارت کے انتخاب اور بین الپارلیمانی تعاون سے متعلق باہمی دلچسپی کے امور پر بھی تبادلہ خیال کیا گیا۔چیئرمین سینیٹ نے اقتصادی تعاون کے وسیع امکانات کو اجاگر کرتے ہوئے ایگری ٹیک، قابلِ تجدید توانائی، فن ٹیک، معدنیات، ٹیکسٹائل، آئی ٹی سروسز اور غذائی مصنوعات کے شعبوں میں تعاون بڑھانے پر زور دیا۔ انہوں نے دونوں ممالک کی کاروباری برادریوں اور چیمبرز آف کامرس کے درمیان روابط کو مزید مضبوط بنانے کی ضرورت پر بھی زور دیا۔ انہوں نے اعلیٰ تعلیم، وظائف، مشترکہ تحقیق، موسمیاتی تبدیلی، قدرتی آفات سے نمٹنے، سائبر سکیورٹی، بحری سلامتی اور امن کے قیام کے شعبوں میں تعاون بڑھانے کی اہمیت پر بھی زور دیا۔چیئرمین سینیٹ نے تعمیری سفارت کاری، بین الاقوامی قانون کے احترام اور تنازعات کے پُرامن حل کی ضرورت پر بھی زور دیا۔ آسٹریلیا کے ہائی کمشنر ٹموتھی کین نے پاکستان کے ساتھ دوطرفہ اور پارلیمانی تعاون کو مزید فروغ دینے کی آسٹریلیا کی خواہش کا اظہار کیا اور دونوں ممالک کے درمیان تعلقات کو مزید مستحکم بنانے کے لیے چیئرمین سینیٹ سید یوسف رضا گیلانی کی کوششوں کو سراہا۔ ملاقات میں آئی ایس سی کی سفیر اور چیئرمین سینیٹ کی مشیر مس مصباح کھر بھی موجود تھیں۔