ٹوبہ ٹیک سنگھ میں سی سی ڈی کا مبینہ مقابلہ، قاتلانہ حملہ کیس میں مطلوب 3 ملزم ہلاک، 4 فرار

ٹوبہ ٹیک سنگھ( نمائندہ خصوصی):ٹوبہ ٹیک سنگھ کے نواحی علاقے چک نمبر 184 گ ب سنہری بنگلہ کے قریب سی سی ڈی پولیس اور ملزمان کے درمیان مبینہ پولیس مقابلہ ہوا جس کے نتیجے میں تین ملزم ہلاک جبکہ چار فرار ہونے میں کامیاب ہوگئے۔ سی سی ڈی ذرائع کے مطابق ہلاک ہونے والے ملزمان کی شناخت غلام شبیر، سہیل افضل اور عمران کے ناموں سے ہوئی ہے۔ پولیس کا کہنا ہے کہ فرار ملزمان کی گرفتاری کے لیے علاقے میں سرچ آپریشن جاری ہے اور مختلف مقامات پر ناکہ بندی بھی کی گئی ہے۔ ذرائع کے مطابق ہلاک اور فرار ہونے والے ملزمان سابق ایم پی اے ریٹائرڈ ایوب خان گادھی پر ہونے والے قاتلانہ حملے کے مقدمے میں مطلوب اور مبینہ طور پر ملوث تھے۔ سی سی ڈی حکام کے مطابق واقعے کی مزید تفتیش جاری ہے جبکہ فرار ملزمان کی گرفتاری کے لیے خصوصی ٹیمیں تشکیل دے دی گئی ہیں اور جلد باقی ملزمان کو بھی گرفتار کر لیا جائے گا۔