پی ایس ایل گیارہ،حیدرآبادکنگز مین نے ملتان سلطانز کو شکست دے کر ایونٹ سے باہر کر دیا

لاہور۔(نمائندہ خصوصی):پاکستان سپر لیگ کے گیارہویں ایڈیشن میں حیدرآباد کنگز مین نے آل رائونڈر کارکردگی کی بدولت ملتان سلطانز کو ایلیمنیٹر ون میں شکست دے کر ایونٹ سے باہر کر دیا ہے۔ بدھ کی شب قذافی سٹیڈیم میں کھیلے گئے ایلمینیٹر 1میں کنگز مین نے سلطانز کو 8وکٹوں سے شکست دے کر ایونٹ سے باہر کر دیا۔ملتان سلطانز کی ٹیم نے پہلے بیٹنگ کرتے ہوئے مقررہ 20 اوورز میں 9 وکٹوں کے نقصان پر 159 رنز بنائے، سلطانز کا آغاز مایوس کن رہا جب محمد علی نے اسٹیون سمتھ کو 13کے سکور پر آئوٹ کر کے پویلین بھیج دیا،کپتان ایشٹن ٹرنر 9 رنز بنا کر آئوٹ ہوئےتو سلطانز کی آدھی ٹیم 52 رنز پر ڈھیر ہو چکی تھی۔ اس مشکل صورتحال میں شان مسعود نے مزاحمت دکھائی اور 46 گیندوں پر 69 رنز کی اننگز کھیل کر ٹیم کو سنبھالا دیا، جس میں 4 چوکے اور 4 چھکے شامل تھے۔ محمد نواز نے 19 رنز بنا کر ان کا ساتھ دینے کی کوشش کی لیکن دوسری جانب سے وکٹیں گرنے کا سلسلہ نہ رک سکا۔حیدرآباد کنگز مین کی جانب سے محمد علی، عاکف جاوید اور حنین شاہ نے 2، 2 کھلاڑیوں کو آئوٹ کیا۔جواب میں حیدرآبادکنگز مین نے مطلوبہ ہدف سولہویں اوور کی دوسری گیند پرمحض دو وکٹوں کے نقصان پر حاصل کر لیا،معاذ صداقت اور عثمان خان نے شاندار نصف سنچریاں بنائیں، دونوں بلے بازوں نے 92 رنز کی شراکت جوڑ کر ٹیم کوفتح دلوائی، دونوں بیٹرز نے 64،64 رنز کی اننگز کھیلیں،صائم ایوب 15 رنز بنا کر ناٹ آئوٹ رہے۔ واضح رہے کہ پی ایس ایل گیارہ کے دوسرے ایلیمنیٹر میچ میں حیدرآباد کنگز مین کا مقابلہ تین بار کی چیمپئن اسلام آباد یونائیٹڈ سے ہو گا۔