لاہور( نمائندہ خصوصی):وزیر اعلیٰ پنجاب مریم نواز نے کہا ہے کہ معاشرے میں سماجی انصاف یقینی بنانے کیلئے تمام متعلقین کو ملکر کام کرنا ہوگا۔ سماجی انصاف کے عالمی دن پراپنے پیغام میں انہوں نے کہاکہ پاکستان مسلم لیگ (ن) کی حکومت 
سماجی انصاف پر پختہ یقین رکھتی ہے۔ سماجی انصاف کو یقینی بنانا ہماری حکومت کی اولین ترجیح ہے۔دین اسلام سماجی انصاف،مساوات و پرامن بقائے باہمی کی تلقین کرتا ہے۔پیغمبر اسلام حضرت محمدﷺ نے انسانیت کے ساتھ ہر لحاظ سے انصاف کرنے کا اہم ترین اورلافا نی پیغام دیا ہے۔ انہوں نے کہا کہ سماجی انصاف سے عاری معاشرے ترقی کی دوڑ میں پیچھے رہ جاتے ہیں۔ مہذب معاشرے کی بنیاد ہی سماجی انصاف اور مساوات ہے۔امیر غریب کی بڑھتی معاشی خلیج سے سماجی مسائل جنم لے رہے ہیں۔ مینارٹی کارڈ اور ہمت کارڈ سمیت دیگر پروگرام سماجی انصاف کے ہدف کی جانب واضح پیش رفت ہے۔
