خیبر پختونخوامیں گزشتہ پانچ روز سے صوبے کی مختلف سڑکیں بند ہیں، جس کے باعث کئی ایمبولنس ٹریفک میں پھنس چکی ہیں اور عوام کی جانیں خطرے میں ہیں، عظمی بخاری

لاہور( نمائندہ خصوصی):وزیر اطلاعات و ثقافت پنجاب عظمی بخاری نے کہا ہے کہ خیبر پختونخوا میں گزشتہ پانچ روز سے صوبے کی مختلف سڑکیں بند ہیں، جس کے باعث کئی ایمبولنس ٹریفک میں پھنس چکی ہیں اور عوام کی جانیں خطرے میں ہیں۔ اپنے ایک بیان میں انہوں نے کہا کہ بانی پی ٹی آئی کی ذاتی ترجیحات اور ”آنکھ کارڈ” کے کھیل کی وجہ سے عوام کی زندگیوں کو دا وپر لگایا جا رہا ہے اور صوبائی حکومت کے لیے عوام کی حفاظت کوئی ترجیح نہیں، بلکہ بانی پی ٹی آئی کی آنکھ اہمیت رکھتی ہے۔وزیر اطلاعات نے کہا کہ اس صورتحال میں ایمبولنس میں لوگ مر رہے ہیں اور خیبر پختونخواحکومت کے لیے عوام کے مسائل حل کرنا ترجیح نہیں ہے بلکہ جلسے کرنا، سڑکیں بند کرنا اور دھرنے دینا اہمیت رکھتے ہیں۔انہوں نے مزید کہا کہ مریم نواز کی قیادت میں حکومت پنجاب ہر ضلع، تحصیل اور یونین کونسل تک عوامی سہولیات پہنچا رہی ہے جبکہ خیبر پختونخواکی حکومت کی رٹ صرف پشاور تک محدود ہے اور مردان، چترال اور کرم کے علاقوں میں تو حکومت کی موجودگی بہت دور کی بات ہے۔عظمی بخاری نے کہا کہ جھوٹے بیانیے اور پروپیگنڈے کی ناکامی کے بعد اب ”آنکھ کارڈ” کھیلا جا رہا ہے، حالانکہ ایک آنکھ 6/9 اور دوسری 6/6 ہے، اور بانی پی ٹی آئی کو گھڑی اور اس کی سوئیاں بھی دکھ رہی ہیں۔ وزیر اطلاعات نے کہا کہ اب تو خیبر پختونخوا کے لوگوں کو ایمبولینس میں مت مارو۔انہوں نے زور دیا کہ عوام کی جانیں بچانا اور ان کے مسائل حل کرنا ہر حکومت کی بنیادی ذمہ داری ہے اور پنجاب حکومت ہر ممکن اقدامات کر رہی ہے تاکہ شہریوں کی حفاظت اور سہولیات کی فراہمی یقینی بنائی جا سکے۔