چیئرمین سینیٹ سید یوسف رضا گیلانی کی یواے ای کی فیڈرل نیشنل کونسل کے سپیکر صقر غباش سے ملاقات، باہمی گہرے، تاریخی اور برادرانہ تعلقات کے حوالے سے تبادلہ خیال کیا

ابوظہبی ۔( نمائندہ خصوصی):چیئرمین سینیٹ سید یوسف رضا گیلانی نےابوظہبی میں متحدہ عرب امارات کی فیڈرل نیشنل کونسل کے سپیکر صقر غباش سے ملاقات کی جس دوران دونوں ملکوں کے درمیان گہرے، تاریخی اور برادرانہ تعلقات کے حوالے سے تبادلہ خیال کیا گیا۔ سینیٹ سیکرٹریٹ سے جاری بیان کے مطابق دونوں رہنماؤں نے پاکستان اور متحدہ عرب امارات کے درمیان موجود گہرے، تاریخی اور برادرانہ تعلقات پر تفصیلی تبادلہ خیال کیا جو باہمی احترام، مشترکہ اقدار اور طویل المدتی تعاون پر مبنی ہیں۔فریقین نے دوطرفہ تعلقات میں حالیہ برسوں کے دوران ہونے والی نمایاں پیش رفت پر اطمینان کا اظہار بالخصوص تجارت، سرمایہ کاری اور عوامی روابط کے شعبوں میں بڑھتے تعاون کو سراہا۔ چیئرمین سینیٹ سید یوسف رضا گیلانی نے سپیکر صقر غباش کا پرتپاک مہمان نوازی پر شکریہ ادا کرتے ہوئے پاکستان کی معاشی استحکام میں یو اے ای کے مثبت اور مؤثر کردار کو سراہا۔ انہوں نے متحدہ عرب امارات کی جانب سے پاکستان میں 10 ارب ڈالر کی سرمایہ کاری کے عزم کو دونوں ممالک کے درمیان اعتماد اور مضبوط شراکت داری کی واضح مثال قرار دیا۔چیئرمین سینیٹ نے سپیکر فیڈرل نیشنل کونسل کو پاکستان کے دورے کی باضابطہ دعوت بھی دی جسے انہوں نے خوش دلی سے قبول کرتے ہوئے کہا کہ وہ جلد پاکستان کا دورہ کرنے کے منتظر ہیں۔ انہوں نے کہا کہ یہ دورہ پارلیمانی تعاون کو مضبوط بنانے اور نئے شعبوں میں اشتراک کے مواقع تلاش کرنے میں معاون ثابت ہوگا۔ملاقات میں پارلیمانی سفارت کاری، تجارت، سرمایہ کاری اور علاقائی و عالمی امور پر بھی تفصیلی تبادلہ خیال کیا گیا۔ دونوں رہنماؤں نے خطے میں امن، استحکام اور خوشحالی کے فروغ کے لیے مشترکہ کاوشوں کی ضرورت پر زور دیا۔ان کا کہنا تھا کہ یہ ملاقات پاکستان اور متحدہ عرب امارات کے درمیان موجود گہرے دوستانہ تعلقات کو مزید مضبوط بنانے کا باعث ثابت ہو گی اور مستقبل میں دوطرفہ تعاون کو مزید فروغ ملے گا۔