انڈونیشیا کے وزیرِ سرمایہ کاری کانائب وزیراعظم و وزیرِ خارجہ محمد اسحاق ڈار کی دعوت پر پاکستان کا سرکاری دورہ

اسلام آباد۔( نمائندہ خصوصی):انڈونیشیا کے وزیرِ سرمایہ کاری و ڈاؤن اسٹریم انڈسٹری روزان روزلانی نے 9 سے 10 فروری تک نائب وزیراعظم و وزیرِ خارجہ محمد اسحاق ڈار کی دعوت پر پاکستان کا سرکاری دورہ کیا۔روزان روزلانی انڈونیشیا کے خودمختار ویلتھ فنڈ دانانتارا کے چیف ایگزیکٹو آفیسر (سی ای او) بھی ہیں۔انڈونیشین وزیر کا خیرمقدم کرتے ہوئے نائب وزیراعظم و وزیرِ خارجہ پاکستان سینیٹر محمد اسحاق ڈار نے انڈونیشیا کے ساتھ دوطرفہ اقتصادی اور سرمایہ کاری تعاون کو مزید مضبوط بنانے کے لیے پاکستان کے پختہ عزم پر زور دیا۔منگل کو دفتر خارجہ سے جاری بیان کے مطابق دورے کے دوران روزان روزلانی نے وزیراعظم پاکستان سے ملاقات کی۔ وزیراعظم نے 8–9 دسمبر 2025 کو جمہوریہ انڈونیشیا کے صدر پرابوو سوبیانتو کے پاکستان کے تاریخی دورے اور اس موقع پر کیے گئے اہم فیصلوں کو سراہا، جن میں باہمی سرمایہ کاری کے فروغ اور دونوں ممالک کے درمیان مجموعی اقتصادی شراکت داری کو گہرا کرنے کے اقدامات شامل ہیں۔وزیراعظم نے دانانتارا کی جانب سے سرمایہ کاری کی سہولت کے لیے سازگار، شفاف اور سرمایہ کار دوست ماحول فراہم کرنے اور باہمی مفاد پر مبنی اقتصادی تعاون کو آگے بڑھانے کے لیے پاکستان کے پختہ عزم کا اعادہ کیا۔روزان روزلانی نے نائب وزیراعظم و وزیرِ خارجہ سے بھی ملاقات کی۔ دونوں فریقین نے دوطرفہ تعلقات کو مزید مضبوط بنانے کے عزم کا اعادہ کیا اورپاکستان–انڈونیشیا اقتصادی تعاون کے ایک اہم ستون کے طور پر باہمی سرمایہ کاری کے فروغ کی اہمیت پر زور دیا۔انڈونیشین وزیر کو وزارتِ خزانہ، بورڈ آف انویسٹمنٹ اور اسپیشل انویسٹمنٹ فسیلیٹیشن کونسل (SIFC) کی جانب سے پاکستان کی سرمایہ کاری کی صلاحیت، ترجیحی شعبوں اور قابلِ عمل منصوبوں پر جامع بریفنگ دی گئی، جس میں ملک میں دستیاب وسیع سرمایہ کاری مواقع کو اجاگر کیا گیا۔ دونوں فریقین نے انفراسٹرکچر، زراعت، انفارمیشن ٹیکنالوجی، کان کنی و معدنیات، ڈیجیٹل انفراسٹرکچر، صحت، روابط اور توانائی سمیت مختلف شعبوں میں سرمایہ کاری کے تعاون کو فروغ دینے پر اتفاق کیا۔اس ضمن میں پاکستان کی اسپیشل انویسٹمنٹ فسیلیٹیشن کونسل (SIFC) اور دانانتارا کے درمیان ادارہ جاتی روابط قائم کرنے پر بھی اتفاق ہوا۔روزان روزلانی کا دورہ پاکستان اور انڈونیشیا کے درمیان اقتصادی تعاون کو نئی بلندیوں تک لے جانے اور قیادت کی سطح پر طے پانے والے اقدامات کو عملی نتائج میں تبدیل کرنے کے مشترکہ عزم کی عکاسی کرتا ہے۔