پاکستان فلم انڈسٹری کے لیجنڈری اداکار ،چاکلیٹی ہیرو وحید مراد کی سالگرہ جمعہ کو منائی گئی

اسلام آباد(نمائندہ خصوصی):پاکستان فلم انڈسٹری کے لیجنڈری اداکار ،چاکلیٹی ہیرو وحید مراد کی سالگرہ جمعہ 2 اکتوبر کو منائی گئی۔دلکش شخصیت، منفرد انداز گفتگو اور خوبصورت ہیئر سٹائل رکھنے والے ہیرو وحید مراد 2 اکتوبر 1938 کو سیالکوٹ میں پیدا ہوئے۔ پروڈیوسر اور سکرپٹ رائٹر وحید مراد نے اپنے فلمی کیرئیر کا آغاز فلم ”ساتھی “ سے کیا تھا۔وحید مراد اپنے لباس، ہیئرسٹائل اور منفرد انداز کے سبب لالی ووڈ کےانتہائی مقبول ہیرو تھے۔انہوں نےاپنے فلمی سفر میں 125 فلموں میں کام کیا جن میں 38 بلیک اینڈ وائٹ اور 87 کلر فلمیں شامل ہیں۔وحید مراد سینما بینوں کے دلوں کی دھڑکن تھے اور ان کی بہترین فلموں میں دل میرا دھڑکن تیری،ہیرا اور پتھر،ارمان،عندلیب،مستانہ ماہی،دیور بھابھی اورنصیب اپنا اپنا شامل ہیں۔وحید مراد کو ستارہ امتیاز، لائف ٹائم اچیومنٹ اور نگارڈ ایوارڈ سمیت متعدد اعزازات سے نوازا گیا۔وحید مراد نے پاکستان فلم انڈسٹری پر 25 سال تک راج کیا۔ وحید مراد 45 سال کی عمر میں 23 نومبر1938 کو کراچی میں انتقال کر گئے۔ ان کی سالگرہ کے موقع پر شوبز انڈسٹری، فنکار برادری اور مداحوں کی جانب سے بھر پور خراج تحسین پیش کیا گیا۔