عاشی نظامی: اسٹیج و شوبز انڈسٹری میں ایک باصلاحیت اور خوش آئند اضافہ

کراچی (کلچرل رپورٹر) کراچی اسٹیج ان دنوں تازہ اور باصلاحیت چہروں کی کمی کا شکار ہے۔ ایک ہی طرز اور محدود فنکاروں کے باعث اسٹیج ڈراموں میں یکسانیت بڑھتی جا رہی ہے۔ ایسے میں معروف اسٹیج ڈائریکٹر یونس میمن کی کاوشیں قابلِ ستائش ہیں، جو اپنے ڈراموں میں نئے فنکاروں کو مواقع فراہم کر رہے ہیں۔ مہک نور اور ارما احمد جیسے نام ان کی کامیاب حکمتِ عملی کی مثال ہیں۔اب ان کے نئے پروجیکٹ "میری مرضی” میں باصلاحیت اداکارہ عاشی نظامی کو مرکزی کردار کے لیے منتخب کیا گیا ہے۔ عاشی نظامی نے ناپا کے تحت ہونے والے مختلف ڈراموں میں اپنی اداکاری کا لوہا منوایا ہے، اور اب وہ اسٹیج پر بھی اپنی صلاحیتوں کا بھرپور مظاہرہ کرنے کو تیار ہیں۔شوبز حلقوں میں عاشی نظامی کو ایک خوبصورت اور ٹیلنٹڈ اضافہ قرار دیا جا رہا ہے، اور توقع کی جا رہی ہے کہ اگر انہیں معیاری اسکرپٹ، مضبوط کردار اور پیشہ ور ڈائریکٹرز کے ساتھ کام کرنے کے مواقع میسر آئے تو وہ بڑی کامیابیاں سمیٹنے کی بھرپور صلاحیت رکھتی ہیں۔اس موقع پر گفتگو کرتے ہوئے عاشی نظامی کا کہنا تھا:”ایک کامیاب فنکار کے لیے صرف ٹیلنٹ ہی کافی نہیں ہوتا، بلکہ ایک مضبوط اسکرپٹ، متاثر کن کردار اور تجربہ کار ڈائریکٹر کا ساتھ بھی ضروری ہوتا ہے۔ خوشی ہے کہ یونس میمن جیسے معتبر اور کمرشل تھیٹر کے ماہر کے ساتھ کام کرنے کا موقع ملا۔ وہ ہمیشہ فیملی اور سوشل تھیم پر مبنی سبق آموز ڈرامے پیش کرتے ہیں، اور ان کے ساتھ کام کرنا میرے لیے اعزاز ہے۔”