حکومت تمام اداروں میں شفاف ڈیجیٹل ٹیکس سسٹم کو یقینی بنائے گی، رانا ثناء اللہ

اسلام آباد(نمائندہ خصوصی) :وزیراعظم کے مشیر برائے سیاسی امور رانا ثناء اللہ نے ٹیکس وصولی کے نظام میں وسیع تر اصلاحات کی ضرورت پر زور دیتے ہوئے کہا ہے کہ حکومت مکمل طور پر ڈیجیٹلائزڈ اور شفاف فریم ورک کے ذریعے بدعنوانی کے خاتمہ کے لیے پرعزم ہے۔ہفتہ کو میڈیا کے ساتھ خصوصی گفتگو کرتے ہوئے رانا ثناء اللہ نے کہا کہ جدید ترین ڈیجیٹلائزڈ نظام متعارف کرانے کے ذریعے ٹیکس کی وصولیوں کو بہتر بنانے کی اشد ضرورت ہے۔ انہوں نے مزید کہا کہ حکومت موجودہ ڈھانچے کو جدید بنانے اور وصولی کے عمل میں شفافیت کو یقینی بنانے کے لیے پہلے ہی سمارٹ اصلاحات پر کام کر رہی ہے۔ انہوں نے کہا کہ وزیر اعظم محمد شہباز شریف ذاتی طور پر اصلاحاتی ایجنڈے کی نگرانی کر رہے ہیں تاکہ اس بات کو یقینی بنایا جا سکے کہ تمام ادارے انسانی مداخلت کو کم کرنے اور بدعنوانی کے مواقع کو ختم کرنے کے قابل ایک منصفانہ اور ٹیکنالوجی پر مبنی طریقہ کار اپنائیں۔ مشیر وزیر اعظم نے مزید کہا کہ حکومت کی ترجیح ٹیکس نیٹ کو وسیع کر کے قومی معیشت کو مضبوط بنانا، انتظامی کارکردگی کو بہتر بنانا اور جدید ڈیجیٹل سلوشنز کو نافذ کرنا ہے۔ انہوں نے کہا ٹیکس دہندگان کو سہولت فراہم کرتے ہوئے پورے نظام میں سخت جوابدہی کو یقینی بنائیں گے۔ ایک سوال کے جواب میں رانا ثناء اللہ نے کہا کہ آئینی اہمیت کے حامل قومی معاملات تمام اسٹیک ہولڈرز کے درمیان اجتماعی افہام و تفہیم کے متقاضی ہیں۔ انہوں نے کہا کہ حکومت جمہوری مشاورت اور بات چیت پر یقین رکھتی ہے۔ انہوں نے مزید کہا کہ ایسے حساس معاملات پر کوئی یکطرفہ فیصلہ نہیں کیا جائے گا۔ مشیر وزیر اعظم نے کہا کہ ملک میں سیاسی استحکام اور جمہوری اداروں کو مضبوط بنانے کے لیے اتفاق رائے ہی واحد قابل عمل حل ہے۔ انہوں نے کہا کہ چیلنجوں کے باوجود حکومت اصلاحات، بہتر مالیاتی انتظام اور ٹارگٹڈ ریلیف اقدامات کے ذریعے معاشی استحکام کو برقرار رکھنے کے لیے پرعزم ہے۔