لاہور( نمائندہ خصوصی): پنجاب پولیس رحیم یار خان کا کچہ کریمنلز کے خلاف بھرپور آپریشن جاری ہے جس کے دوران ڈاکوؤں کے ہتھیار ڈالنے کا سلسلہ جاری ہے۔ پولیس آپریشن کے نتیجے میں بدنام زمانہ ڈاکو عبدالستار لولائی نے اپنے 4 ساتھیوں سمیت 
پنجاب پولیس کے سامنے سرنڈر کر دیا۔ترجمان پنجاب پولیس نے بتایا کہ سرنڈر کرنے والے ڈاکو عبدالستار لولائی پر حکومتِ پنجاب کی جانب سے 25 لاکھ روپے انعام مقرر تھا۔ عبدالستار لولائی اور اس کے دیگر ساتھیوں پر اغوا برائے تاوان اور دیگر سنگین جرائم 
کے متعدد مقدمات درج ہیں۔ڈی پی او رحیم یار خان عرفان علی سموں نے کہا ہے کہ سرنڈر کرنے والے ڈاکوؤں کے ساتھ قانون کے مطابق سلوک کیا جائے گا۔ انہوں نے مزید کہا کہ پنجاب پولیس کی کچہ کریمنلز کے خلاف کارروائیاں بلا تعطل جاری رہیں گی اور علاقے میں قانون کی عملداری ہر صورت یقینی بنائی جائے گی۔
***
